Talsverð eftirspurn er meðal farþega skemmtiferðaskipa eftir ferðum út í Vigur og á Hesteyri, en Sjóferðir Hafsteins og Kiddýjar bjóða upp á ferðir þangað sem innihalda bæði leiðsögn og veitingar. Auk þess að bjóða upp á dagsferðir, sigla Sjóferðir einnig á hverjum degi til og frá Hornströndum með farþega. Hver og einn getur því pantað sér far til Hornstranda og tekið bátinn nokkrum dögum síðar til baka. Jafnt Íslendingar sem útlendingar sækja í áætlunarferðirnar til Hornstranda að sögn Kiddýjar, en starfstímabil Sjóferða er frá maí fram í miðjan september.

Þrátt fyrir að finna megi fyrir bjartsýni og spenningi í rödd Kiddýjar fyrir sumrinu, er ljóst að hún hefur þungar áhyggjur af veðurfarinu á Vestfjörðum - eins og það hefur verið síðustu daga. „Ég vil þennan snjó burt strax í dag, ég er hundfúl yfir þessu. Veðurfar sem þetta er afar slæmt fyrir ferðaþjónustu á Vestfjörðum og er ekki beinlínis að gera okkur neina greiða," segir Kiddý, sem segir veðrið geta haft alvarleg áhrif á fuglalíf. „Fuglalífið í Vigur er t.a.m. eitthvað sem við byggjum á, okkar ferðaþjónustu. Ég vil ekki þurfa að segja ferðamönnunum að allir fuglarnir í eyjunni hafi drekkt sér af því það var svo kalt!"

Sjóferðir var stofnað formlega árið 1998, en fyrirtækið er með þrjá báta á sínum snærum, þá Guðrúnu Kristjánsdóttur, Blika og Ingólf.

gudmundur@bb.is

Sumarið lítur vel út að sögn Hafsteins og nú þegar hafa borist fjölmargar bókanir. Aukning hefur verið á ferðamönnum síðastliðin ár að sögn Hafsteins. „Aukningin hefur ekki verið í neinum stökkum, heldur hægt og sígandi," segir Hafsteinn. Stærsti hluti ferðafólksins eru Íslendingar en hins vegar færist það í vöxt að farþegar erlendra skemmtiferðaskipa sem leggjast að bryggju á Ísafirði, bregði sér í ferð út í Vigur eða á Hesteyri. „Við erum með bryggju á Hesteyri sem við eigum og með tilkomu hennar hafa ferðir með farþega af skemmtiferðaskipunum aukist talsvert."

Hafsteinn segir helstu breytinguna í sumar vera þá að ekki verður lengur boðið upp á siglingar um Hornstrandir frá Norðurfirði á Ströndum. „Það hafa margir haft samband við okkur til að spyrja um þetta en við getum ekki sinnt þessu héðan. Það er alltof langt og dýrt að fara héðan og norður fyrir," segir Hafsteinn. Hann segir ferðir á Hornbjarg vinsælastar auk göngugerða frá Aðalvík og yfir á Hesteyri. Ekki er algengt að fólk dvelji langdvölum á Hornströndum nema að það eigi hús á svæðinu en eitthvað er þó um að ferðafólk hafi með sér tjald. „Ég held að það sé minna um það núna að fólk fari með bakpokann og labbi langar leiðir. Þetta eru orðnir styttri göngutúrar og fólk vill láta fara með vistir fyrir sig á milli staða. Það er öðruvísi en var fyrir um fimm til sex árum," segir Hafsteinn.