Nú þegar mesti annatíminn er yfirstaðinn í siglingunum er samt margt sem huga þarf að. Til að mynda vorum við að bera vörn á Bryggjuhúsið fyrir veturinn. Ekki endaði sumaraðið vel hvað varðaði komur skemmtiferðaskipanna, en tvö síðustu skipin hættu við að flytja farþega sína í land vegna veðurs. Búið er að sækja flotbryggjuna á Hesteyri og koma henni í skjól fyrir veturinn. Nú tekur við föst áætlun í Vigur og Æðey með póst og frakt, auk þess sem flytja þarf barn úr Vigur í og úr skóla í hverri viku. Líka þarf að huga að bátunum og framkvæma hefðbundar lagfæringar og eftirlit á þeim.
Sumarið hefur verið gott hvað veður varðar og mikill fjöldi ferðamanna verið fluttur á hina ýmsu staði, en kostnaður vegna olíuhækkana hefur verið langt umfram hækkun á fargjöldum, og setur það eflaust strik í reikninginn hvað útkomuna varðar þegar upp verður staðið.
Við viljum þakka öllum þeim sem ferðuðust með okkur í sumar og bjóðum þá velkomna aftur !

Nú þegar líða tekur á sumarið og lundinn er floginn burt úr Vigur bjóða Sjóferðir upp á glímukynningu fyrir utan Viktoríuhús við mjög góðar undirtektir ferðamanna, en í dag var farþegum Funchal einmitt boðið upp á slíka kynningu. Stígur Berg Sóphusson kynnti glímuna fyrir ferðamönnunum á meðan þeir Sigurður Óli Rúnarsson og Stefán Birkir Stefánsson úr Herði glímdu, og sýndu hin ýmsu brögð í sókn og vörn. Þeim var klappað lof í lófa að sýningunni lokinni. 132 ferðamenn og 6 estkortar fóru með Sjóferðum í Vigur í dag. Nú fer senn að líða á síðustu komur skemmtiferðaskipa þetta sumarið, en aðeins tvö eru eftir, sem bæði koma nú í vikunni. Annað á morgun og hitt á föstudag. Þeirra farþegum verður einnig boðið upp á slíkar sýningar. Í dag gerðu ferðamennirnir sér að góðu að skoða uppstoppaðan lunda sem vakti óskipta athygli, og var myndaður í bak og fyrir.
Myndasyrpa frá deginum í Vigur er komin inn á myndaalbúmið.

Laugardaginn 2. ágúst var farin hin árlega kjötsúpuferð til Hesteyrar. Farið var á tveimur bátum að vanda og var ágætt veður í ferðinni, ládauður sjór og þurrt. Heldur kónaði þegar leið á kvöldið, en varðeldurinn sá til þess að allir náðu að halda á sér hita. Heimilisfólkið í Læknishúsinu var með marga potta fulla af kjötsúpu tilbúna þegar gestir mættu, og gekk vel að framreiða hana, en tjaldað hafði verið fyrir ofan húsið, en þar inn komust hátt í þrjátíu manns til að borða súpuna. Auk þess var setið í öllum stofum Læknishússins. Eftir matinn var sest á pallinn og sungið og gantast þar til varðeldur var tendraður í fjörunni. Kvöldinu lauk með því að Hafnarstjórinn á Hesteyri skaut upp nokkrum flugeldum, sem merki um það að nú ættu allir að mæta í bátana. Ánægðir og glaðir farþegar komu síðan til Ísafjarðar um þrjátíu mínútum eftir miðnætti. Nýja myndasyrpu úr ferðinni má nú finna inn á vefnum.

Það er ekki á hverjum degi sem heimamenn fá að fara um borð í þau skemmtiferðaskip sem sækja Ísafjörð heim. Um daginn var henni Láru Rán, leiðsögumanni hjá Sjóferðum, boðið um borð í eitt þeirra stærri eftir að hún lauk leiðsögn í Vigur, en stúlka sem vinnur á skipinu bauð henni að koma um borð og tók hana í leiðsögn um skipið til að borga fyrir Vigurferðina. Lára tók margar myndir um borð og við sýnum þrjár þeirra hér með fréttinni, sem sýnir útsýnið af efsta þilfari skipsins.